ang sugilanon sa tuko ug sa tiki

sa tinuod lang di man ko mahadlok og tuko. una, dako pa ako ana;. pwerte! ug ika-duha, di man sad na mamahit. apan di jud nako kapugngan nga malisang kung makakita ko sa "among" tuko mata'g gabii nga mosud ko's among kasilyas. ambot og ngano adto man sad na siya mag-estambay, manyakis ngali! dili sad siguro, kay sa akong nadunggan ganahan man ni'ng mga tuko og bugnaw sama sa semento, so mao na'ng ganahan kaayo ni'ng "among" tuko nga mopauraray sa kabugnaw sa tilya (tiles sa inenglis) sa among kasilyas. OA ra kaayo ka 'dong! dili ko sure sa iyang gender busa ato lang ni siya'ng damhon nga usa ni siya ka lalaki. kay ang-ang man sad og babaye, mga lalaki ra biya mamuso, noh?
naghisgot naman lang jud ta'g tuko, ato nalang sad og apilon ang mga tiki. ang mga yati, gapuno-puno lang sa kasagbot sa akong lawak! mura'g daghan pa ilang iti kaysa akong buhok nga nanglarot (as of last count, 23 nalang ni ka-lusok akong buhok sa o). ambot sad ani nila, ari man sad mag-estambay sa akong lawak nga pwede man ni sila moadto sa among silingan, mas maayo didto naa'y kanunay mosilhig sa ilang iti. di jud siya sakto.
sa pagbalhin namo niining dapita, upat na katuig ang milabay, wa jud ko kahimdum nagda mi og tiki ug tuko gikan sa among karaang gipuy-an. kay nahinumdum ko gamay pa ko kaniadto (mga 2 inches siguro), naa mi mga tuko, kalingawan man lang to og pasol sa akong mga ig-agaw nga mga wa'y lingaw, gamit ang taga nga gipan-an og ok-ok (ingun ana kabibo amo'ng clan). so kining tuko dia namo ron, sa silingan jud ni sigurado, ug abi kay wa man kaayo tawo didto, nibakwit taw'n ang talawan sa among payag. gaa'g chance, swerte man kuni ni'ng mga tuko. pero ang tiki? mura'g tig kaon ra jud ni sila sa mga insekto nga naglupad-lupad sa mga bombilya sa suga. mao ra! pero in fairness, magamit sad biya ni sila usahay hilabi na kung ensomyahon ko, pareha anang kanta nga "butiki sa kesame," ingun ana among show. kana kung gi-ensyomya sad sila, magtinutokay 'mi, pero og nangatog ang mga inahak, magsolo ra taw'n ko. katapusan.